យោងតាមគេហទំព័រសិល្បៈ Mirror ចេញផ្សាយកាលពីថ្ងៃទី១ ធ្នូ ២០១៤ ឱ្យដឹងថា តារាសម្តែង និងម៉ូដែលឥណ្ឌានាង Gauhar Khan ត្រូវទស្សនិកជនទះកំផ្លៀងដោយសារតែនាងស្លៀកឈុតសិចស៊ីពេកក្នុង កម្មវិធី Raw Star នៅស្ទូឌីយោ Film City ក្នុងទីក្រុងម៉ុមបៃ ប្រទេសឥណ្ឌា កាលពីថ្ងៃទី៣០ វិច្ឆិកា ។
យុវជនម្នាក់បានស្ទុះ ទៅទះកំផ្លៀងតារាស្រីរូបនោះពេញមួយទំហឹង រួចដើរចេញពីលើឆាកបន្ទាប់ពីក្រុមសន្តិសុខឡើងទៅពិនិត្យមើលនាង Gauhar Khan ។ យុវជនរូបនោះឈ្មោះ Akil Malik អាយុ២៤ឆ្នាំ ជាទស្សនិកជនម្នាក់ក្នុងចំណោមទស្សនិកជន២.៥០០នាក់ ។
Akil Malik ត្រូវសមត្ថកិច្ចចាប់ខ្លួន និងបញ្ជូនទៅតុលាការ ។
សារព័ត៌មាន ក្នុងស្រុក «ហិណ្ឌូស្ថាន ថែម» បានផ្សាយដោយយោងលើសម្តីរបស់ប៉ូលិសថា «ការសើុបអង្កេតក្នុងដំណាក់កាលដំបូងបានដឹងថា ក្នុងកម្មវិធីនោះមនុស្សម្នាក់ក្នុងចំណោមទស្សនិកជនជាច្រើននិយាយ ដៀមដាមដាក់នាង Gauhar Khan ។ ក្រោយមកភាគីទាំង២ប្រកែកគ្នាយ៉ាងតឹងសរសៃក ធ្វើឱ្យស្ថានការណ៍កាន់តែអាក្រក់ឡើង ។ បន្ទាប់មកមានយុវជនម្នាក់ឡើងទះកំផ្លៀងនាង Gauhar Khan តែម្តង» ។
អំពើ ហិង្សាលើស្ត្រីភេទ កំពុងមានការពិភាក្សាគ្នានៅក្នុងប្រទេសឥណ្ឌា ដើម្បីរកដំណោះស្រាយក្រោយពី២ឆ្នាំមុន ពលរដ្ឋនៅទូទាំងប្រទេសភ្ញាក់ផ្អើលើព័ត៌មានស្តីពីនិស្សិតស្រី ម្នាក់ ត្រូវគេចាប់រំលោភជាក្រុម និងបោះទម្លាក់ពីលើរថយន្តក្រុងនៅក្រុងញូវដេលី។ ចាប់តាំងពីពេលនោះមកបទល្មើសលើផ្លូវភេទមិនបានធ្លាក់ចុះទេ ថែមទាំងមានលក្ខណៈអាក្រក់ជាងមុន នៅប្រទេសឥណ្ឌា ៕
_____________________
ប្រភពៈ មហាគ្រួសារ